El domingu 1 d’ochobre entamamos en Grau’l Día’l traxe’l país pa da-y al nuestru paxellu tradicional el protagonismu que merez porque, anque siempre ta presente en toles celebraciones asturianes, ye de xusticia que tenga una fiesta propia: un día pa vistir, llucir y vivir el traxe.
El Día’l traxe’l país va arrancar a les diez de la mañana y quier ser un alcuentru del que pueda disfrutar la xente, llenando la villa de Grau –y el so mercáu– con persones que vistan reproducciones de traxes asturianos de la segunda metá del sieglu XIX pol gustu de facelo. Una fiesta de reivindicación de la cultura asturiana onde se pueda ver y enseñar la nuestra ropa tradicional.

Tamién el domingu 1 d’ochobre, na Plaza los Dolores de Grau, a les once hores, va facese Indumentaria: el primer concursu de traxes tradicionales asturianos. Van poder participar, inscribiéndose enantes del día 26 de setiembre, homes y muyeres pa llucir ropa tradicional de gala o de diario.
Ye importante precisar qu’Indumentaria nun ye un certame de guapura física, ye un concursu onde se va valorar que les persones se vistan con xeitu según les fontes documentales que se conocen, reproduciendo la manera de vistir de los asturianos de la segunda metá del sieglu XIX. Cada persona proyecta la so manera de ser na ropa que viste: esa ye la riqueza.

Indumentaria naz pa que se valoren los traxes tradicionales asturianos, pa difundir el conocimientu de la nuestra ropa tradicional, pa promover la escelencia nel vistir y na confección de prendes tradicionales que son reproducciones de les documentaes na época citada. Indumentaria quier ser tamién un estímulu y un reconocimientu de les persones que fueron faciendo traxes del país con aciertu y fidelidá a la tradición.
Nesti certame, un xuráu cualificáu, plural y independiente va repartir 900 euros en premios. Indumentaria ye un concursu qu’espera la vuestra participación. Podéis consultar les bases en: indumentaria.com.es/bases

domingu
1 d’ochobre
día’l traxe’l país

PLAZA LOS DOLORES, GRAU

caja_rural_wt_ye_qd
b_alto_wt_qd_ho
conc_grau_wt