Bases

Primera: Van poder participar nel Tercer Concursu d’Indumentaria de traxes tradicionales asturianos toles persones mayores de 18 años que cumplan les bases d’esti certame y respeten les normes de la organización.

Segunda: Pa poder participar, ye requisitu indispensable inscribise enantes de les 23:59 hores del llunes 24 de setiembre y rellenar el formulariu colos datos personales y de contactu disponible na páxina web indumentaria.com.es. La organización acuta’l derechu a determinar un númberu másimu de persones por razones operatives. Van tener derechu preferente a participar les persones que primero s’inscriban, quedando les demás fuera del concursu.

Tercera: Los participantes nel concursu tienen que vistir un traxe compuestu por pieces y complementos confeccionaos en cualquier época pero que reproduzan de manera fiel (en corte, diseñu, adornos, xéneros, colores, estampaos, etc.) les prendes qu’hasta la fecha se documentaron, de manera rigorosa y por medios diferentes, como propios del paxellu tradicional asturianu ente los años 1850 y 1900 en cualquier parte d’Asturies. La organización va dexar fuera del concursu a persones inscrites con traxes fuera d’esa época.

Cuarta: Nel concursu van facese dos categoríes: homes y muyeres.

Quinta: Por cada categoría, el xuráu va poder dar tres premios: un Primer Premiu, dotáu con 200 euros y una lliga que reconoza a la persona ganadora como Premiu Indumentaria 2018; un Segundu Premiu, dotáu con 150 euros, y un Tercer Premiu, dotáu con 100 euros. El xuráu va poder declarar toos o dalgunos de los premios desiertos. Los premios van abonase n’efectivu y van tar suxetos a la llexislación vixente en materia fiscal. El fallu del xuráu va ser inapelable.

Sesta: Nun van poder participar nel concursu les persones que sían padres o madres, fíos o fíes, xenros o nueres, nietos o nietes, hermanos o hermanes, cuñaos o cuñaes, primos o primes carnales o pareyes –o persones coles que tengan una relación afectiva asemeyada– de cualquier miembru del xuráu.

Sétima: El xuráu va valorar les prendes de vistir y de calzar, les xoyes y los complementos de cada participante según l’estatus del traxe que se viste y la zona xeográfica que se representa. Los traxes puen ser de gala o de diario. El xuráu va valorar la idoneidá del texíu, el corte y la confección, amás de los colores y les combinaciones adecuaes de prendes y complementos. El xuráu va penalizar la falta de xeitu nel vistir o la presencia d’elementos ayenos al traxe del país y a la época que se representa según les fontes documentales que se conocen hasta la fecha. El xuráu va valorar la presencia nel traxe de prendes auténtiques de la segunda metá del sieglu XIX nos participantes que les vistan y asina lo acreíten. El xuráu nun va valorar preseos o otros elementos que lleven les persones participantes nel concursu.

Octava: El xuráu va tar compuestu d’un mínimu de dos y un máximu de seis persones espertes nel ámbitu de la investigación etnográfica, la confección de traxes y xoyes tradicionales asturianes, y l’estudiu de la indumentaria tradicional asturiana.

Novena: Los participantes comprométense a respetar les normes, horarios y instrucciones de la organización del concursu. En casu contrariu, van poder quedar descalificaos. Amás, les persones concursantes van tener que firmar un documentu de cesión de los derechos de la so imaxe a la empresa B. Alto Creativos SL –como organizadora del actu–, que va poder facer semeyes del eventu y de los participantes y difundiles en redes sociales, páxines web y medios de comunicación. La organización acuta’l derechu a cambiar el sitiu onde se va facer el concursu dientro de la villa de Grau hasta’l mesmu día del eventu por razones operatives o meteorolóxiques. En tal casu, anunciaráse a les persones inscrites nel concursu pelos medios disponibles.

Décima: El certame va facese en Grau’l domingu 30 de setiembre de 2018, en convocatoria única, a les once la mañana. El sitiu onde tienen que presentase los participantes ye la Plaza los Dolores. Los participantes van desfilar per una pasera instalada na plaza de delantre del edificiu. La duración del concursu va depender del númberu de participantes.

Undécima: Cada miembru del xuráu va emitir un votu priváu individual de cada traxe. Los tres primeros premios van ser pa los traxes que más puntuación saquen en cada categoría. Anguaño, el xuráu fórmenlu Amadéu Benavente, Consuelo Ríu, Ana Villanueva y Constantino Menéndez. Tolos participantes van aceptar el resultáu que salga de les puntuaciones del xuráu ensin protestalu.