Bases

Primera: Van poder participar nel Quintu Concursu Indumentaria de Traxes Tradicionales Asturianos, toles persones que tengan más de 18 años y que cumplan les bases d’esti certame y respeten les instrucciones de la organización.

Segunda: Pa poder participar, ye requisitu inscribise después de les 23:59 hores del 31 d’agostu y antes de les 23:59 hores del llunes 20 de setiembre. Amás hai que rellenar el formulariu colos datos personales, sobre’l traxe y de contactu, que ta disponible na páxina web indumentaria.com.es. También ye requisitu indispensable mandar una semeya de la persona que quier concursar col traxe, esactu, col que va participar n’Indumentaria 2021.

Tercera: La organización acuta’l derechu d’almisión y el de decidir un númberu másimu de persones participantes por razones operatives, escoyendo –llegáu’l casu– les que vistan propuestes que representen un exemplu meyor de traxe’l país asturianu, quedando les demás inscrites fuera d’esta edición. La decisión de la organización va ser comunicada a cada participante.

Cuarta: Los participantes nel concursu tienen que vistir un traxe compuestu por pieces cosíes en cualquier época, pero que reproduzan de manera fiel (en corte y confección, diseñu, xéneros, estampaos, etc.), les prendes que los estudios sobre la materia determinen que son propies del paxellu tradicional asturianu o traxe’l país asturianu. Les persones inscrites con traxes que ten fuera d’esti conceptu, aunque seyan propios del sieglu XIX, nun van poder participar.

Indumentaria ye un concursu sobre fatos con cortes del sieglu XIX propios del traxe’l país y sobre la fachenda nel vistir a la manera tradicional asturiana, y nun ye un concursu de personaxes que representen oficios o llabores de la época y por eso nun se va poder llevar nengún preséu, instrumentu, zurrón, etc. Lo que se premia y s’enseña al xuráu y al públicu nel desfile pola pasera­ ye la ropa y l’aciertu na manera de vistila.

Quinta: Nun van poder participar nel concursu les persones que vistan prendes que yá recibieren dalgún premiu n’ediciones anteriores. En cualquier momento del Concursu, incluso depués de conocese los premios, la organización va poder descalificar a los participantes que nun cumpliesen con esta base. Los descalificaos van tenese por non presentaos a tolos efectos.

Sesta: El xuráu va valorar lo que los participantes visten y calcen, les xoyes y adornos –casu de llevalos– o el palu en función col l’estatus del traxe que se viste y la zona xeográfica asturiana que se representa.

Sétima: Los traxes pa concursar puen ser de gala o de diario, pero siempre van tener que llevar les pieces coles que se vistía una persona pa salir de casa y presentase nun espaciu públicu a mediaos del sieglu XIX. El xuráu va valorar la fachenda, el que los texíos, colores, corte y la confección seyan como los que se gastaben daquella y les combinaciones adecuaes de prendes. El xuráu va penalizar la falta de xeitu nel vistir o la presencia d’elementos que nun son del traxe’l país asturianu. El xuráu va valorar la presencia nel traxe de prendes auténtiques asturianes del sieglu XIX nos participantes que les vistan y asina lo puedan acreditar.

Octava: Nel concursu van facese dos categoríes: homes y muyeres.

Novena: Por cada categoría, el xuráu va poder dar tres premios: un Primer Premiu, dotáu con 200 euros y unes lligues que reconozan a la persona ganadora como Premiu Indumentaria 2021; un Segundu Premiu, dotáu con 150 euros, y un Tercer Premiu, dotáu con 100 euros. El xuráu va poder declarar toos o dalgunos de los premios desiertos. Los premios van abonase n’efectivu a partir del día siguiente de concedese, per tresferencia bancaria, y van tar suxetos a la llexislación vixente en materia fiscal. El fallu del xuráu pa les persones que participen ye inapelable.

Décima: El xuráu va tar compuestu d’un mínimu de dos y un máximu de seis persones espertes nel ámbitu de la investigación etnográfica, la confección de traxes y calzao tradicional asturiano y l’estudiu de la indumentaria tradicional del país.

Undécima: Nun van poder participar nel concursu les persones que seyan padres o madres, fíos o fíes, xenros o nueres, nietos o nietes, o pareyes –o persones coles que tengan una relación afectiva asemeyada– de cualquier miembru del xuráu.

Duodécima: Cada miembru del xuráu va emitir un votu priváu individual de cada traxe. Los tres primeros premios van ser pa los traxes que más puntuación saquen en cada categoría. Tolos participantes van aceptar el resultáu que salga de les puntuaciones del xuráu ensin protestalu.

Decimotercera: Los participantes por inscribise comprométense a respetar les normes, horarios y instrucciones de la organización tol tiempu que dure’l Concursu. En casu contrariu van poder quedar descalificaos. Amás, les persones concursantes van tener que firmar un documentu de cesión de los derechos de la so imaxe a la empresa organizadora, que va poder facer semeyes del eventu y de los participantes y difundiles per cualquier mediu (les redes sociales, páxines web, medios de comunicación, etc).

Decimocuarta: El certame va facese en Grau’l domingu 26 de setiembre de 2021, a partir de les diez y media de la mañana. El sitiu onde tienen que presentase les persones participantes ye la Plaza los Dolores. Los participantes van tener que posar pa una semeya, van tener que desfilar per una pasera instalada pola organización y van tener que esperar el turnu asignáu nel espaciu que la organización tenga preparáu pa esi menester, na posición que se-y adxudique, ensin poder abandonalu durante’l certame. La duración del concursu va depender del númberu de participantes, pero toos van tener que tar a disposición ente les 10:30 y les 15 hores del día que se celebre. Los participantes comprométense a respetar les midíes de seguridá en materia sanitaria y de respetu de la distancia a la que haiga que ponese d’otres persones lo que dure’l concursu.

Decimoquinta: La organización acuta’l derechu a cambiar el sitiu onde se va facer el concursu, dientro de la villa de Grau, hasta’l mesmu día del eventu por razones operatives, de seguridá o meteorolóxiques. En tal casu, anunciaráse a les persones inscrites nel concursu pelos medios disponibles.

Cabera: La redacción de les bases d’Indumentaria Concursu y Muestra de Traxes Tradicionales Asturianos ye una creación intelectual d’Alberto Suárez Fernández. Queden acutaos los derechos d’autor y queda prohibía la reproducción, total o parcial, que nun seyan col fin d’informar d’esti Concursu.

Indumentaria, Concursu y Muestra de Traxes Tradicionales Asturianos ye una marca rexistrao d’Alberto Suárez Fernández.