El domingu 26 de setiembre va ser un día dedicáu al traxe’l país, onde’l nuestru paxellu tradicional tenga’l protagonismu que merez, porque, anque siempre ta presente en toles celebraciones asturianes, ye de xusticia que tenga una fiesta propia: un día pa vistir, llucir y vivir el traxe.
El programa d’actividaes d’Indumentaria 2021 va arrancar a les diez de la mañana con música tradicional. Convidamos a tola xente que vista reproducciones curioses de traxes asturianos del país a llenar la villa de Grau y el so mercáu, entamando una fiesta que ye reivindicación de la cultura asturiana onde se pueda ver y enseñar la nuestra ropa tradicional.

Tamién el domingu 26 de setiembre, na Plaza los Dolores de Grau, a les once hores, va entamar Indumentaria 2021, el Quintu Concursu de Traxes Tradicionales Asturianos. Van poder participar, inscribiéndose nesta web del 1 al 20 de setiembre, homes y muyeres pa llucir el traxe’l país de gala o de diario.
Ye importante precisar qu’Indumentaria nun ye un certame de guapura física, ye un concursu onde se va valorar que les persones se vistan con xeitu y fachenda según les fontes documentales que se conocen, reproduciendo la manera de vistir de los asturianos de mediaos del sieglu XIX. Cada persona proyecta la so manera de ser na ropa que viste: esa ye la riqueza.

Indumentaria naz pa que se valoren los traxes tradicionales asturianos, pa difundir el conocimientu de la nuestra ropa tradicional, pa promover la escelencia nel vistir y na confección de prendes tradicionales que son reproducciones de les documentaes como traxe’l país. Indumentaria quier ser tamién un estímulu y un reconocimientu de les persones que fueron faciendo paxellos con aciertu y fidelidá a la tradición asturiana.
Nesti certame, un xuráu cualificáu, plural y independiente va repartir 900 euros en premios. Indumentaria ye un concursu qu’espera la vuestra participación. Podéis consultar les bases en: indumentaria.com.es/bases

domingu
26 de setiembre
indumentaria

V CONCURSU Y MUESTRA
DE TRAXES TRADICIONALES
ASTURIANOS

PLAZA LOS DOLORES, GRAU

caja_rural_wt_ye_qd
conc_grau_wt